Пронајдени и безбедно отстранети артилериски гранати од Првата светска војна на траса за гасовод

По пријава од граѓанин, екипа на Дирекцијата за заштита и спасување (ДЗС) интервенираше на локација каде што се изведуваат градежни работи за изградба на гасовод.

Интервенцијата ја изврши пиротехничарот на ДЗС, Зоран Пеев од Штип, при што при теренскиот увид беа пронајдени и безбедно отстранети шест артилериски гранати со калибар од 75 милиметри.

Станува збор за експлозивни направи кои потекнуваат од периодот на Првата светска војна, заостанати од Солунскиот фронт.

Пронајдените гранати беа транспортирани на безбедна локација и предадени на полигонот Криволак, каде што ќе бидат уништени согласно утврдените безбедносни процедури.

Од Дирекцијата за заштита и спасување информираат дека благодарение на навремената пријава и брзата реакција е спречена потенцијална опасност по безбедноста на граѓаните и работниците вклучени во градежните активности.