Трамп предупреди на нов можен удар врз Иран и „сериозни последици“ за Хамас ако не се разоружа
Американскиот претседател Доналд Трамп изјави дека Соединетите Американски Држави би можеле повторно да изведат голем воен напад врз Иран доколку Техеран продолжи со обновување на програмите за балистички ракети или нуклеарно оружје. Истовремено, тој испрати остра порака и до палестинската милитантна група Хамас, предупредувајќи дека ќе се соочи со сериозни последици доколку не се разоружа.
Говорејќи по средбата со израелскиот премиер Бенјамин Нетанјаху во неговиот имот Мар-а-Лаго во Флорида, Трамп изрази сомнеж дека Иран повторно работи на развој на оружје, по американскиот напад во јуни.
„Читав дека повторно градат оружје и други капацитети. Ако го прават тоа, не се на истите локации што ги уништивме, туку можеби на други места“, изјави Трамп пред новинарите, додавајќи дека американските разузнавачки служби внимателно ги следат активностите на Техеран.
Тој алудираше и на можноста за нова воена интервенција, нагласувајќи дека САД точно знаат каде и што прави Иран, но изрази надеж дека до тоа нема да дојде. „Не сакаме повторно да трошиме гориво на Б-2 бомбардери“, рече Трамп, потсетувајќи дека претходната мисија траела 37 часа во двата правци.
И покрај заканите, Трамп истакна дека во последните месеци се отворил простор за потенцијален нуклеарен договор со Иран. Тој нагласи дека разговорите со Нетанјаху биле насочени кон унапредување на кревкиот договор за прекин на огнот во Газа, како и кон безбедносните предизвици поврзани со Иран и Хезболах во Либан.
Иран минатата недела соопшти дека спровел ракетни вежби по втор пат во текот на месецот, по 12-дневниот конфликт со Израел во јуни. Нетанјаху, пак, изјави дека Израел не бара конфронтација со Техеран, но внимателно ги следи извештаите за неговите активности.
Во однос на состојбата во Газа, Трамп изрази желба за премин кон втората фаза од договорот за прекин на огнот меѓу Израел и Хамас, постигнат во октомври, кој предвидува распоредување меѓународни мировни сили во палестинската енклава. Сепак, двете страни меѓусебно се обвинуваат за прекршување на договорот, а напредокот кон следната фаза останува неизвесен.
Хамас одбива да се разоружа, додека Израел предупредува дека во спротивно ќе продолжи со воените дејствија. Трамп ја префрли одговорноста врз милитантната група, тврдејќи дека Израел ги исполнил своите обврски од договорот.
„Ако не го положат оружјето, ќе има сериозни последици. Ќе има пекол за плаќање“, предупреди Трамп.
Распоредувањето на меѓународни безбедносни сили во Газа е предвидено со резолуција на Советот за безбедност на Обединетите нации од 17 ноември, но политичките и безбедносните пречки и натаму го доведуваат во прашање нејзиното спроведување.