Советот на Град Скопје го усвои буџетот за 2026 година

Советот на Град Скопје едногласно го усвои буџетот за 2026 година, без ниту еден глас „против“. Градоначалникот Орце Ѓорѓиевски оцени дека усвоениот документ е доказ за „ред, визија и резултати“, најавувајќи засилен инвестициски циклус во нарниот период.

Основниот буџет изнесува 5.201.600.000 денари, што претставува зголемување од 12,04 проценти во однос на буџетот за 2025 година. Според Ѓорѓиевски, растот е резултат на подобрената наплата на приходите во последниот месец и половина, а до крајот на годината се очекува пренесен вишок од над 400 милиони денари.

Дополнително, како што информираше градоначалникот, обезбедени се 260 милиони денари преку спогодба со Министерството за образование и наука и одлука на Владата за студентски превоз, со што ќе се покријат заостанати обврски.

Капиталните инвестиции се планирани во износ од 1,787 милијарди денари, што претставува 34,4 проценти од вкупниот буџет и значително зголемување во споредба со претходната година. Овие средства, според најавите, ќе бидат насочени кон инфраструктурни проекти и зафати на терен, со директен ефект врз секојдневието на граѓаните.