Евростат: Македонија со најниски цени на храната во Европа

Цените на храната во Македонија се најниски во цела Европа, покажуваат најновите податоци на Евростат, кои ги споредуваат трошоците за основни прехранбени производи во 36 европски земји.

Храната претставува еден од најголемите трошоци за европските домаќинства и во просек учествува со 11,9 проценти од вкупната потрошувачка во Европската Унија. Во некои земји, како Романија, овој удел достигнува дури 20 проценти, што дополнително ја нагласува важноста на цените на прехранбените производи за животниот стандард.

Споредбата се темели на индексот на цени на Евростат, каде што просечната цена на кошничката за храна во ЕУ е поставена на вредност 100. Земјите со индекс над 100 имаат повисоки цени од европскиот просек, додека оние под 100 се сметаат за поевтини.

Најскапа земја во Европа е Швајцарија, со индекс од 161,1, што значи дека храната таму е за над 61 процент поскапа од просекот на ЕУ. По неа следуваат Исланд со индекс од 146,3 и Норвешка со 130,6.

Во рамките на Европската Унија, највисоки цени на храната се регистрирани во Луксембург, каде што тие се за 25,7 проценти повисоки од просекот. На спротивниот крај од листата е Романија, која важи за најевтина земја членка на ЕУ кога станува збор за прехранбени производи.

Кај најголемите економии во Унијата, Германија и Италија имаат цени малку над европскиот просек, додека Франција е значително поскапа. Шпанија, пак, е меѓу поевтините, со цени за околу 5,4 проценти под просекот на ЕУ.

Ниските цени на храната се генерално карактеристични за Југоисточна Европа и Западен Балкан. Турција, Босна и Херцеговина, Црна Гора и Бугарија исто така се значително под европскиот просек.

Според податоците на Евростат, Македонија се издвојува како најевтина земја во Европа по цените на храната. Стандардната потрошувачка кошничка изнесува околу 73 евра, што е за 27 проценти пониско од просекот на Европската Унија.