Италија застана со Белгија против планот на ЕУ за користење на замрзнатите руски средства за Украина
Италија ѝ се приклучи на Белгија во противењето на планот на Европската унија да ги искористи замрзнатите руски државни средства како основа за бескаматен заем за Украина, произлегува од интерен документ до кој дојде Политико. Овој потег сериозно ги доведува во прашање напорите на Европската комисија да обезбеди политички договор уште на претстојниот самит на ЕУ.
Интервенцијата на Рим, една од највлијателните земји-членки на Унијата, доаѓа помалку од една недела пред состанокот на лидерите на ЕУ во Брисел, закажан за 18 и 19 декември. Европската комисија се надеваше дека токму на тој самит ќе биде постигнат договор за активирање на милијарди евра руски девизни резерви, кои се чуваат во белгиската финансиска институција „Евроклер“, со цел финансиска поддршка на украинската економија разурната од војната.
Заеднички отпор и повик за алтернативи
Белгија веќе подолго време изразува резерви кон планот, стравувајќи од можни правни последици и високи отштети во случај Русија да добие арбитражна постапка. Сепак, досега немаше јасна поддршка од други земји-членки.
Ситуацијата се промени откако Италија, заедно со Белгија, Малта и Бугарија, подготви документ со кој ја повикуваат Европската комисија да разгледа алтернативни модели за финансирање на Украина во наредните години, без користење на замрзнатите руски средства.
Четирите земји бараат продолжување на дискусијата за „други опции во согласност со правото на ЕУ и меѓународното право, со предвидливи параметри и значително пониски правни и финансиски ризици“, со цел одговор на финансиските потреби на Украина.
„План Б“ со сериозни ограничувања
Како можна алтернатива се споменува таканаречениот „план Б“, кој предвидува заедничко задолжување на Европската унија за финансирање на Украина. Но, и овој пристап наидува на отпор, бидејќи би можел дополнително да го зголеми јавниот долг во земји како Италија и Франција, а воедно бара и едногласна одлука, што отвора можност за блокада од унгарскиот премиер Виктор Орбан.
Иако овие земји не располагаат со доволно гласови за да формираат блокирачко малцинство, нивниот јавен скептицизам значително ги намалува шансите Европската комисија да обезбеди политички консензус во краток рок.
Поддршка за санкциите, но резерви за користењето на средствата
Италијанската премиерка Џорџија Мелони досега јавно ги поддржува санкциите против Русија, но нејзината владина коалиција е поделена кога станува збор за поддршката на Украина. Вицепремиерот Матео Салвини, на пример, отворено го поддржа предлогот на американскиот претседател Доналд Трамп за прекин на војната.
Дополнително, Белгија, Италија, Малта и Бугарија изразија сомнеж и околу идејата Европската комисија да користи вонредни овластувања за трајно замрзнување на руските средства преку измена на постојните правила за санкции.
Иако овие земји вчера гласаа за одлуката за долгорочно замрзнување на руските средства, тие јасно посочија дека тоа не значи автоматска согласност за нивна употреба.
„Таквото гласање во никој случај не ја прејудицира одлуката за евентуално користење на имобилизираните руски средства, која мора да се донесе на ниво на лидери“, наведуваат четирите земји во документот.
Тие предупредуваат дека предложениот правен механизам носи „далекусежни правни, финансиски, институционални и процедурални последици“, кои би можеле да имаат ефекти далеку надвор од конкретниот случај со Украина и Русија.