Македонска државјанка убиена во Италија – сопругот во бегство

Сериозен инцидент ја потресе Италија, каде 49-годишна жена од Македонија наводно била претепана до смрт од нејзиниот сопруг.

Според италијанските медиуми, жртвата Саџиде Муслија, по потекло од Македонија, била пронајдена мртва во својот стан во Пјанело Валесина, мало село во општината Монте Роберто во покраината Анкона. Нејзиното тело имало бројни траги од насилство, а италијанските власти трагаат по осомничениот – нејзиниот 50-годишен сопруг Назиф Муслија.

Жената била најдена во кревет, со видливи повреди и сериозни удари во пределот на главата. Полицијата била алармирана од нејзиниот работодавач, откако Муслија не се појавила на работа.

Двојката била во бракоразводна постапка, но медиумите наведуваат дека сопругот повторно се вселил кај неа. Тој имал долга историја на семејно насилство и повеќе претставки поднесени од жртвата. Во април годинава бил уапсен поради физички напад врз сопругата.

Во еден од претходните инциденти, тој ја разбил вратата од спалната соба со секира, откако жената избегала кај соседи сомневајќи се дека е неверен. Муслија пријавила дека две години била изложена на постојано насилство. Минатото лето тој склучил спогодба за признавање вина, по што, и покрај историјата на злоупотреба, двојката повторно се соединила.

Истрагата продолжува, а полицијата трага по осомничениот сопруг кој е во бегство.