Бугарскиот парламент го одби референдумот на Радев за воведување на еврото во 2026 година

Народното собрание на Бугарија денес го отфрли предлогот на претседателот Румен Радев за распишување референдум околу тоа дали земјата треба да го усвои еврото во 2026 година. Одлуката беше донесена со 135 гласа „против“, 81 „за“ и три „воздржани“, пренесуваат бугарските медиуми.

Со ова, дефинитивно заврши политичкиот спор кој траеше од мај, кога Радев неочекувано го поднесе предлогот, иако Бугарија веќе напредува во подготовките за приклучување кон еврозоната на 1 јануари 2026 година.

Референдумската иницијатива влезе во пленарна процедура откако Уставниот суд оцени дека поранешната претседателка на парламентот Наталија Киселова го прекршила Уставот со блокирање на процесот. Новата претседателка, Раџа Назаријан, ја продолжи постапката и предлогот го испрати во матичните комисии.

Седницата беше прекината неколку пати бидејќи од кабинетот на претседателот не беше испратен претставник да го образложи барањето. По повеќе паузи и без објаснување од претседателската институција, расправата продолжи без нивно присуство.

Партиите Преродба, Големина и МЕЧ го поддржаа референдумот, тврдејќи дека граѓаните треба да ја имаат конечната одлука. Пратениците од Преродба дури развија транспарент со порака „Референдум за левот, а не за еврото“, кој претседателката Назаријан го отстрани поради нарушување на редот.

Во писмено обраќање, Радев истакна дека воведувањето на еврото е прашање од стратешки и финансиски интерес за граѓаните, кое, според него, бара „широк јавен консензус“.

Иницијативата дојде во период кога Европската комисија се подготвува да даде позитивна оценка дека Бугарија ги исполнува условите за приклучување кон еврозоната во 2026 година.