НАТО повторно пресретна иранска балистичка ракета насочена кон Турција

Воздушните сили на НАТО денеска пресретнаа балистичка ракета лансирана од Иран кон Турција, потврдија турското Министерство за одбрана и Алијансата. Ракетата била пресретната над област во Газиантеп, на југот на Турција. Засега нема пријави за жртви или материјална штета. Ова е втор ваков инцидент од почетокот на ескалацијата на конфликтот на Блискиот Исток.

Турција повикува на воздржаност

Турското Министерство за одбрана ги повика сите страни, особено Техеран, да се воздржат од дејствија што би можеле да ги загрозат цивилите и да ја поткопаат регионалната стабилност.

Анкара нагласи дека е решителна во заштитата на својот воздушен простор и граничната безбедност, истовремено предупредувајќи дека мора да се избегне понатамошна ескалација во регионот.

НАТО: Цврсто стоиме во одбрана на сите сојузници

Потврда за инцидентот стигна и од портпаролката на НАТО, Алисон Харт, која на платформата X напиша:

„НАТО повторно пресретна ракета насочена кон Турција. НАТО цврсто стои во својата подготвеност да ги брани сите сојузници од каква било закана.”

Втор инцидент за пет дена

Ова е втор пат НАТО да пресретне иранска ракета насочена кон Турција откако ескалираше конфликтот. Првиот инцидент се случи пред пет дена, кога воздушните сили на Алијансата ја собориле ракетата пред да влезе во турскиот воздушен простор.

Од Иран засега нема коментар во врска со наводите за нападот.